Take a fresh look at your lifestyle.

అంతర్వేది రథం దగ్ధం వెనుక ఉగ్రవాదులు? న్యాయ విచారణకు డిమాండ్ : పవన్ కళ్యాణ్

0 42

అంతర్వేదిలో రథం దగ్ధం ఘటనలో ఉగ్రవాద కుట్రకోణం ఉందనే అనుమానం వస్తోందని జనసేనాని పవన్ కళ్యాణ్ ఆరోపించారు.

తూర్పు గోదావరి జిల్లా అంతర్వేది శ్రీలక్ష్మీ నరసింహస్వామి వారి ఆలయంలో రథం రగ్ధం చేసుకున్న ఘటనపై జనసేన అధినేత పవన్ కళ్యాణ్ తీవ్రంగా స్పందించారు. ఈ ఘటన వెనుక ఉగ్రవాద కోణం ఉందేమోనని అనుమానం వ్యక్తం చేశారు. ఈ విషయంలో ఏపీ పోలీసులపై నమ్మకం లేదని, రిటైర్ట్ జడ్జితో విచారణ జరిపించాలని పవన్ డిమాండ్ చేశారు. ఈ మేరకు మంగళవారం పవన్ కళ్యాణ్ ఓ వీడియో విడుదల చేశారు.

మొన్న పిఠాపురం, కొండబిట్రగుంట.. ఇప్పుడు అంతర్వేది ఘటనలు ఇవన్నీ యాదృచ్ఛికాలు కావని పవన్ వ్యాఖ్యానించారు. ఎన్ని విగ్రహాల ధ్వంసాలు, రథాల దహనాలు యాధృచ్ఛికంగా జరుగుతాయని చెబుతారని ప్రశ్నించారు. ఇది మతిస్థిమితం లేనివారి పని, తేనె పట్టు కోసం చేసిన పని అంటే పిల్లలు కూడా నవ్వుతారన్నారు. పిఠాపురంలో దేవతా విగ్రహాల ధ్వంసం సమయంలోనే సరిగా స్పందిస్తే ఇలాంటివి జరిగేవా? అని ప్రభుత్వాన్ని ప్రశ్నించారు. విశ్వాసాలను దెబ్బతీస్తున్న తీరుపై ఆడపడుచులందరూ మంగళ, శుక్రవారాల్లో హారతులిస్తూ తమ నిరసన తెలపాలని పవన్ కళ్యాణ్ పిలుపునిచ్చారు. ఇతర మతాల పెద్దలూ ఈ ఘటనలను ఖండించాలన్నారు.

ఏపీ పోలీసులపై నమ్మకం లేదు..
‘‘పోలీసుల దర్యాప్తుపై నమ్మకం లేదు. హైకోర్టు విశ్రాంత న్యాయమూర్తితో విచారణ జరిపించాలని డిమాండ్ చేశారు. వైసీపీ ప్రభుత్వం సరిగా స్పందించకుంటే సీబీఐ దర్యాప్తు కోసం కేంద్రాన్ని కోరతాం. అలాగే విషయంలో ఉగ్రవాద కోణం ఎక్కువగా ఉందనిపిస్తే కేంద్ర పరిధిలోని ఎన్ఐఏ దృష్టి సారించాలని అప్పీల్ చేస్తాం. అలాగే హిందూ క్షేత్రాల్లో అన్యమత ప్రచారాన్ని కచ్చితంగా ఆపాలి. దేవాలయాలు, మత విశ్వాసాలకు సంబంధించిన ఘటనలు ఏవైనా చాలా సున్నితమైన అంశాలు. గత కొద్ది నెలలుగా వరుస క్రమంలో జరిగిన అష్టాదశ శక్తి పీఠాల్లో ఒకటైన పిఠాపురంలో దుర్గాదేవి, వినాయకుడు, సాయిబాబా విగ్రహాలను ధ్వంసం చేసిన విధానం, విజయవాడలోని శ్రీ కాశీవిశ్వేశ్వరాలయం భూములకు సంబంధించి, సింహాచలం మాన్సాస్ ట్రస్ట్కి సంబంధించిన వివాదంగానీ, నెల్లూరు జిల్లా కొండబిట్రగుంటలో శ్రీ ప్రసన్న వేంకటేశ్వస్వామి వారిని తీసుకువెళ్లే రథాన్ని తగులబెట్టేయడం గురించి కచ్చితంగా మాట్లాడాలి. ఇది ఆలయాలను, ధార్మిక కేంద్రాలను అపవిత్రం చేసే విధానమే’’ అని పవన్ మండిపడ్డారు.

మెహర్బానీ రాజకీయాలు ఎక్కువయ్యాయ్!
‘హిందూ మతం విషయంలో ఎవరూ ఎందుకు స్పందించరు?. ఏ మత ప్రార్థనా మందిరాలను అయినా సరే ఇలా అపవిత్రం చేస్తే అందరూ ఇబ్బంది లేకుండా మాట్లాడుతారు. కానీ హిందూ దేవాలయాలకు సంబంధించిగానీ, హిందూ మతానికి సంబంధించిగానీ మాట్లాడాలంటే మనల్ని మతవాదులు అనేస్తారా? అన్న ఒక భావజాలాన్ని ప్రవేశ పెట్టారు. ఇది చిన్నప్పటి నుంచీ చూస్తున్నాను. రాజ్యాంగం అందరికీ సమానమైన హక్కులు ఇచ్చింది. మానవ హక్కులనేవి ప్రతి ఒక్కరికీ సమానం. ఏ మతానికి కానీ , ఏ కులానికి చెందిన వారైనా అందరికీ సమానంగా ఇచ్చారు. సెక్యులరిజం అంటే అందర్నీ సమానంగా చూడటమే. కొంత మందిని ఎక్కువ సమానంగా చూడమని కాదు కదా. ఈ క్రమంలో మెహర్బానీ రాజకీయాలు ఎక్కువైపోయాయి’’ అని పవన్ సీరియస్ వ్యాఖ్యలు చేశారు.

ఈ కారణాలు నమ్మశక్యమేనా?
‘‘హిందూ ధర్మాన్ని వెనుకేసుకొస్తే నువ్వు లౌకికవాదివి కాదు అంటారు. హిందూ ధర్మంపై దాడి జరిగినప్పుడు ఖండిస్తే నువ్వు సెక్యులర్ వాదివి కాదు అంటారు. మరే మతం మీద దాడి జరిగినా విగ్రహాలను పాడు చేసినా, ప్రార్థనా మందిరాలను అపవిత్రం చేసినా.. నువ్వు గొంతేసుకుని నిలబడితేనే సెక్యులర్ వాదివి. ఇలాంటి మౌఢ్యంతో కూడిన పడికట్టు భావజాలాలు పెరిగిపోతూ ఉన్నాయి. ఈ కారణాలు నమ్మశక్యమేనా?. ఇది ఒక సంఘటనో రెండు సంఘటనలో అయితే చిన్న స్థాయిలో స్పందించి వదిలేసేవాడిని. కానీ వరుస క్రమంలో జరుగుతూ ఉంటే మౌనంగా ఉండలేం’ అని పవన్ కళ్యాణ్ తీవ్ర ఆగ్రహం వ్యక్తం చేశారు.

Leave A Reply

Your email address will not be published.